Amapfa yarateye Bakame irasonza; Maze yibuka ibyo gusuhuka. Iti: “Mu Kinyaga mpafite mabukwe Nahakoye inka zanjye umunani.” Bakame iragenda, ibonye inaniwe, Ijya mu gicucu munsi y’igiti, Irora hejuru ibona icyiyone Gitamiye umunopfu w’umutari. Nkunda agatukura Bakame ikarusha! Iti: “Henga nihendere ...

Umunsi umwe, urukwavu rwari runaniwe maze rwiryamira munsi y’igiti kinini cy’ipapayi, rurasinzira. Amapapayi y’icyo giti yari yarahishije cyane. Kubera uburemere, rimwe riza guhanuka, ryikubita hasi, iruhande rw’urukwavu. Urukwavu rukangukira hejuru rufite ubwoba, rukeka ko ari nyir’umurima uruvuza amabuye ashaka kurwica. ...

Kera amapfa yarateye, izuba riracana, ibyatsi n’ibiti biruma, biragwengera, ibitungwa bibura icyo birya, ibintu biradogera, abantu bakajya guhaha aho imvura yagwaga. Hakabaho ihene, ikitwa Ruhaya. Ibwira izindi hene zose iti: «Nimuze tujye guhahira muri ririya shyamba rigwamo imvura; turishe ubwatsi. ...

Bukeye, ingwe ijya guhiga. Imbwa ibonye amagufwa ayagirana ku zuba, iribwira iti: “Icyica abana b’ingwe ni uko nyahekenyera hafi; ndenze imisozi ibiri, nayahekenya ntibigire icyo bitwara.” Ibatura igufwa, igenda yiruka irenga imisozi ibiri. Ibona umwobo w’inyaga yinjizamo ikinwa, irahekenya, irahekenya…. ...

Umunsi umwe imbwa yarakugendeye ijya gushaka ubuhake ku ngwe. Ingwe irayibwira iti: “Ko imbwa mukunda amagufwa, naho twe tukayazira, naguhaka nte?” Imbwa irayisubiza iti: “Impamvu duhekenya amagufwa, ni uko tutabona inyama; mbonye inyama, amagufwa se kandi nayashakaho iki?” Ingwe iti: ...

Umunsi umwe uruyongoyongo rwarakugendeye ruraritse urunwa n’urujosi ruza kugera ku nkombe y’uruzi. Rurabukwa ifi ebyiri mu mazi hafi y’inkombe y’uruzi. Ruba rwarazifashe iyo rubishaka, ariko kubera rwari rutarasonza ruriraramira. Hashize umwanya, akayara kararushikura. Haza kuza agafi gatoya, uruyongoyongo rwanga kugafata! ...

Hari umwana w’umukobwa, akitwa Nyiranda. Yari yarajujubije ababyeyi be. Bamusigaga ku rugo akiba inzoga cyangwa amata, bamubaza uwakoze ibyo ati: «Simbizi.» Kandi ibintu ari we wabiyogoje! Bagira ngo babitse ibiryo by’abana bato akabirya; nyina yamubaza, akavuga ko atazi uwabyibye! Bityo ...

Imbwa n’intama byarabanaga, bikaba inshuti cyane, kandi byari bihuje umuruho. Umunsi umwe byicara ahantu hiherereye, biganira iby’imibereho yabyo. Intama iterura ivuga iti: «Iyo ntekereje amaherezo yacu muri iyi si, nsanga nta gisimba na kimwe duhwanyije umubabaro, ibyo bikantera agahinda kanini, ...

Habayeno umukobwa w’inkumi, akitwa Bwiza kandi akaba mwiza koko. Umuntu wese wamubonaga yumvaga amukunze ariko nyirakuru akamukunda by’akarusho. Bukeye nyina aramubwira ati: “Enda iyi fu n’uru rwabya rw’amavuta, ubishyire nyogokuru kandi ntutinde mu nzira cyangwa ngo urangare. Wibuke no kumuntahiriza.” ...

Kera intare yabwaguriye mu ishyamba, irangije ibyana ibisasira mu isenga, ikajya ibigaburirira aho. Muzi rero ko intare irya byinshi, ndetse n’ibyana byayo bivuka bizi kurya cyane. Ni yo mpamvu iyo ntare yagombaga kwica inyamaswa nyinshi, kugira ngo ibone ibiyihaza yo ...

Habayeho umuntu akitwa Ngarama, akaba n’umugaragu w’umwami. Muri icyo gihe hariho igisiga kinini kikitwa Saruhara rwa Nkomokomo. Abantu bari barakigize indahiro. Cyagiraga amaboko cyane, kikabuza umwami guturwa. Cyabonaga abafite amakoro kikabica, ibintu byabo kikabirya. Umwami agira umujinya, agiteza ingabo ngo ...

Ni Ruhaya rw’isekurume Rwa murarika icyanwa Iyo yarase igihembe Udusekurume turayihunga. Igira ibihembe bireba inyuma Ikagira ubwanwa irarika iteka; Igira umugara wo ku mugongo Ikawushinga iri ku rugamba. Igira imihore myiza cyane Ikaba itungo ryo mu batindi. Iyo bayikuyeho uruhu ...

Koko uri mwiza si ukubeshya Sinkurata bimwe bisanzwe Abantu benshi bakabya cyane Amezi cyenda mu nda yawe Untwite ugenda wigengesereye Udahuga wanga ko mpugana. Ngo igihe mvutse ntarareba Umfureba neza ndanezerwa Ngira ubushyuhe imbeho ntiyaza Imbehe yanjye ubwo ikaba ibere. ...

Habayeho umugabo akagira abana batatu b’abahungu, nyina w’abo bana akaba yarashaje.  Uwo mugabo nta cyo yagiraga, uretse inzu yari atuyemo. Buri mwana muri abo bana rero, akifuza kuzaragwa iyo nzu. Ibyo kuyibagabanya cyangwa kuyigurisha byo mu muryango wabo bari barabibabujije. ...

Ariko izasimbuye ya mpyisi, ntizashoboye kuyirusha ubutwari. Imwe gusa muri zo, ni yo yashoboye gutahura uburyarya bwa Bakame. Nyamara zose zarayisuzuguraga, zikayinegura ingendo n’uko iteye. Akanyamasyo muzi ukuntu kagenda ariko gasodoka; karakugendeye gakururuka kageze kuri rya riba, kihisha mu mazi. ...

Kera izuba ryaracanye, imigezi irakama, nuko inyamaswa zose ziraterana, zijya inama yo gushaka uburyo zafukura iriba rirerire, zigira ngo none zagera ku mazi. Inyamaswa zose zirabyemera, uretse Bakame yavuze ko nta mbaraga ifite. Umwami w’ishyamba hamwe n’ibyegera bye, byemeza ko ...

Kera habayeho umugabo Ndebe akaba umukungu kandi akagira inshuti eshatu yitaga iz’amagara. Umunsi umwe yenga inzoga atumira abe bose na za nshuti ze baranywa baranezerwa. Bamaze kwizihirwa, umwe muri bo witwaga Nzamurambaho arahaguruka ati : “Ndagukunda, none nguhaye inka.” Abari ...

Umusaza yari afite abuzukuru batatu b’abasore; abo bana ntibumvikane, ahubwo iteka bagahora batongana. Sekuru yabireba bikamubabaza cyane. Bukeye arababwira ati: «Bana banjye, mujye mubana neza ntimugahore mupfa ubusa. » Abasore bawe ntibabyiteho bikomereza umwiryane wabo. Umunsi umwe, umusaza amaze kubona ...

Injangwe n’imbeba byaruzuraga, bikaganira, bigakina, bigasangira akabisi n’agahiye. Imbeba igasigara ku rugo, injangwe ikajya guhiga. Imbeba yacukuraga umwobo mu miganda y’inzu; ariko injangwe ntimenye impamvu mugenzi wayo acukura uwo mwobo. Umunsi umwe bijya inama, byiyemeza kwiba ikimasa. Birakunyarukira nijoro, bizana ...

Impyisi yarihoreye ibwira imbwa iti: «Uraze twuzure, tunywane. » Imbwa irabyemera, biranywana, bikajya bitumirana. Umunsi umwe, binywa amayoga kwa Mpyisi; ngo bucye binywa amayoga kwa Mbwa. Imbwa ibwira ya mpyisi iti: «Umunsi napfuye uzampambe, ariko uzampambe iwanjye. Nanjye nupfa nzaguhamba ...

Umunsi umwe isha yaganiraga n’izindi nyamaswa, nuko iza kuzibwira, iti: « Aho mwari muzi ko naguze ya nzovu nini muzi, none ikaba inkorera? » Impongo yumvise ayo magambo iratangara cyane, iti : ” Ni uko uvuze ? Sigaho kutubeshya ! ...

Ubushwiriri bwari bufite se, yarabubyaye ari butandatu, hanyuma arapfa. Umunsi umwe, bwigira inama buti: “Tujye guhakirwa inka.” Ubushwiriri bujya guhakwa. Bumaze kugabana inka imwe, burataha. Busohoye bujya inama buti: “Turye iyi nka, nitumara kuyirya dusubire kwa databuja, aduhe indi. ” ...

Umunsi umwe, umuntu wategaga inyoni yateze umutego we mu byatsi, hejuru yawo ahamisha amasaka menshi. Inuma zije zirayahasanga. Umutware wazo arazibaza ati: « Aya masaka yamenwe n’iki aha? Nimube muretse kuyatora tubanze tujye inama. » Izindi numa ziranga. Zihera ko ...

Umuntu yajyanye indogobe ye kugura umunyu. Hanyuma agaruka awuhekesha iyo ndogobe. Yumva umutwaro urayishengura, ndetse igiye kwambuka umugezi igwamo. Umunyu wikubise mu mazi urashonga, maze noneho umutwaro worohera indogobe. Irishima rwose, ikomeza kugenda; ngo yigire imbere, yitura hasi yigiza nkana, ...

Injangwe yagiye gufata inkoko, ifatwa n’umutego uyica umurizo. Ihura n’izindi zigenda ziyiseka. Iza guhagarara irazibwira iti: “Mfite ijambo rimwe mbabwira.” Izindi ziti: “Tuguteze amatwi.” Na yo iti: “Imirizo yacu iraturushya rwose. Kandi n’iyo dushatse kwihisha mu mwobo ntitume twihisha rwose ...

Isega inanutse yabonye imbwa ibyibushye irayibaza, iti: « Ko nduzi ubyibushye wabyibuhijwe n’iki, ko jyewe nabuze ikintunga? » Imbwa irayisubiza iti: «Aho mba haba ibyo kurya byinshi, umurimo wanjye ni ukurinda ibisambo, kandi databuja arankunda cyane; nunkurikira ndajya kugusabira ibiryo. ...

Umunsi umwe, umuhari wahuye n’isega, urayibwira uti: “Umuntu agira intege cyane, nta nyamaswa yamukira itamuhenze ubwenge.” Isega iti: “Iyo mbona umuntu rimwe risa, ni ukuri naherako musumira.” Umuhari uti: “Ejo uzaze nkwereke umuntu kandi nzamugufasha.” Nuko ngo bucye mu gitondo, ...

Kera isega yinjiye mu nzu mu gicuku, igwa mu ngunguru irimo inzigo y’umukara. Mu gitondo nyir’iyo nzigo araza, ngo akubite amaso iyo sega akeka ko yapfuye, ayikuramo ayijugunya ahantu mu rubingo, isega yifatira iy’ishyamba. Izindi nyamaswa zayibona zikayitangarira, ziti: “Ako ...

Nijoro mu gicuku, igisambo cyaje ku nzu kigira ngo cyibe ibintu biyirimo, imbwa irakibona iramoka. Nyir’urugo arabyuka, arareba ntiyagira icyo abona, maze akangara ya mbwa ngo iceceke, arongera ajya kulyama. Igisambo kibonye ko asubiye kuryama, kiragaruka, kigerageza gukingura umuryango ngo ...

Imbeba yakuviriye mu mwobo itangira kuzerera ishaka icyo yarya. Iribwira iti: “Nzi ubwenge, no kunshuka biragoye, kuko nizera bake. Nta we ushobora kumfata.” Yikoza hirya, yikoza hino; izerera inzu yose ariko iheba icyo yicisha isari. Inyarukira mu kigega, ihingukira kuri ...

Intare yarihoreye yiryamira mu ndiri yayo. Imbeba ziraza zigumya kuyikina iruhande. Imwe muri zo yurira ibuye ryari hejuru y’intare, irihanuka hejuru yitura hasi, ikangura intare. Intare ikangutse ifata akaguru k’imbeba. Imbeba yumvise ko intare iyifashe, irayibwira iti: “Ndagusaba imbabazi. Singukanguye ...

Ni inturo y’umujinya Ya Rutigerera igicuku Yenze ibara ry’igishwi n’ikibiribiri Ihirika mu Buranga Itunguka kwa Nzogiroshya. Ibona Kibamba yaraye ku mutambiko w’urusenge Rusake ihina ibikohwa Ikubiramo ibirokoroko iramiraza. Imbeba yaraye mu muheno Iti: “Ngiye kubaza ibyo!” Iyikoma ijanja Iheruka gukoma ...

Ingwe yari ihatse urukwavu, impongo, igikeri n’igitagangurirwa. Bukeye ishaka kujya kwa sebukwe, igufatira abana b’impongo n’ab’igitagangurirwa, ibashyira mu ruhago irarukanira, ihamagara abagaragu bayo ngo bajyane kwa sebukwe. Ikwika igikeri uruhago rurimo ba bana, urukwavu rutwara itabi rya shebuja, impongo itwara ...

Umuyaga n’izuba byajyaga bitongana iminsi yose, kimwe kikabwira ikindi ko kikirusha amaboko. Bukeye bibona umuntu wihitira. Umuyaga uti: “Ngiye kumwambura iriya kanzu ye, nandusha imbaraga wowe ugashobora kuyimwambura, ndemera ko nawe uzindusha.” Izuba riremera. Umuyaga urahuha cyane, ugerageza kuyimwambura. Wa ...

Umunsi umwe, uruyuki rwarabutswe isazi ku muzinga warwo, maze ruyibwirana uburakari ruti: “Uje kwenda iki hano? Uyobewe ko muri udusimba tubi, mutagomba kwivanga n’abamikazi bo mu kirere?” Isazi yumvise ayo magambo arayirakaza, maze igira ipfunwe, ariko ipfa kwihangana na yo, ...

Impyisi yashakaga umugabo mwiza. Umunsi umwe irakugendera ibwira izindi nyamaswa byabanaga iti: “Ndashaka nanjye gusabwa.” Izisaba no kuzayishakira umusore uzayisaba. Bukeye Bakame irakuzira ibwira ya mpyisi iti: “Nakuboneye umusore mwiza cyane.”, iti: “Ndetse ni umwami, ategeka ibihugu byinshi cyane.” Impyisi ...

Impyisi yari hamwe n’izindi nyamaswa, maze irebye umurizo wayo isanga utameze nk’uw’izindi. Ako kanya ifata umugambi wo kujya kubaza Imana icyatumye iyiha umurizo mubi kandi udasa n’uw’izindi nyamaswa. Iryo joro ntiyasinzira, bucya yageze ku Mana. Irayibwira iti : « Nyagasani, ntiwambwira ...

Urukwavu rwuzuye n’umuhari. Bukeye rurawubwira ruti: “Ngwino twihingire umurima, tuwuteremo ibigori n’urutoke”. Umuhari uremera ariko ubwira urukwavu uti: “Ko ntazi kurira insina, urutoke nirwera imineke nzayimanura nte?” Urukwavu ruti: “Ndi umuhanga wo kurira; ibitoke nibikomera nzajya mbimanura”.  Nuko biherako bihinga ...

Urukwavu rwatonganye n’igikona, rurarakara cyane, rushaka kucyica. Ariko igikona kibibonye gityo, kirigurukira kiragenda. Urukwavu ruti : « Iki gisiga nagikinishije, mba nacyishe nkakirya ». Nuko urukwavu rugerageza guhimba ubwenge bwo kuzacyica. Rujya ahirengeye, aho ibikona byakundaga gutora. Ruhageze rubona Sakabaka, ...

Kera hariho abavandimwe babiri b’abakene. Umwe ntiyakundaga gukora ngo abone imyaka n’amafaranga, ntiyagiraga ubwira muri byo; akibwira ko amafaranga azamwizanira akamusanga iwe. Ayabuze akajya avuga ati: «Ndi umukene. Singira ibintu. None se ngire nte ko bitangwa n’Imana?» Nuko akirirwa yiyicariye ...

Umunyeshuri warezwe neza usanga anogeye bose, kuko bamusangana ingiro n’imvugo bishimishije. Usanga yubaha abakuru, abana neza n’urungano n’abamugwa mu ntege. Mbese imyifatire ye ari ntamakemwa. Mu ishuri, iyo amaze gusuhuza Mwalimu, amutega amatwi, akumva ibyo amwigisha, maze akayora atyo ubwenge ...